Ғасырлар қойнауынан жеткен әрбір әннің астарында елдің мұңы мен қуанышы, сағынышы мен сүйініші, арман-аңсары мен асқақ рухы жатыр. Осындай асыл мұраны ардақтап, ұлттың рухани қазынасын бүгінгі ұрпақпен сабақтастыратын «Еркесі еркін елімнің» атты концерт – дәстүрлі ән өнерінің терең тамырына бойлап, халық жүрегінде мәңгі сақталған әуезді әндерді қайта жаңғыртатын тағылымды кеш.
Бұл кеште қазақ ән өнерінің көгінде жарық жұлдыздай жарқырап, өз дәуірінің үніне айналған Үкілі Ыбырай, Мұхит Мерәліұлы, Тұрмағамбет Ізтілеуұлы, Қапез Байғабылов, Майра Уәлиқызы, Нұртуған Кенжеғұлұлы сынды көрнекті өнер иелерінің шығармалары шырқалады. Олардың әндерінен халқымыздың дархан мінезі, кең даланың тынысы, жүректің нәзік лүпілі мен өмірдің терең сырлары сезіледі.
Көрермен көңіліне бала кезден таныс, жүрек түкпірінен орын алған «Әсеттің әні», «Айнамкөз», «Майра», «Гәкку», «Шандоз», «Қанеки, тілім, сөйлеші» секілді сырлы туындылар кештің көркемдік өзегіне айналады. Әр ән – өз алдына бір тарих, әр әуен – ұрпақтан ұрпаққа аманат болып жеткен асыл мұра. Ал Мұқағали Мақатаевтың сөзіне жазылған әндер поэзия мен әуеннің үндестігін танытып, тыңдарманды сезім мен сырға толы ерекше әлемге жетелейді.
Концерттің мазмұндық өрісін түркі халықтарының ортақ музыкалық мұрасы да кеңейте түседі. Қазақтың дәстүрлі әндерімен үндескен қырғыз және қарақалпақ әндері бауырлас елдердің рухани жақындығын, тамыры тереңнен тартылған мәдени байланысын айшықтайды. «Сарой», «Жылқычы» сынды туындылар арқылы көрермен түркі дүниесіне ортақ әуездік өрнектерді танып, әр халықтың өзіндік бояуы мен ортақ болмысын сезінеді. Бұл – шекарадан биік тұратын өнердің тілімен табысқан халықтардың достығы мен ынтымағын дәріптейтін сәт.
Ән – кейде жүректегі сағынышты сөйлетсе, кейде анаға деген шексіз құрметті асқақтатады, ал енді бірде туған жерге деген махаббатты оятып, ұлттық рухты биіктетеді. Концерт бағдарламасындағы «Мен қазақ қыздарына қайран қалам», «Қыздарға әсемдік жарасады», «Ана туралы жыр», «Құстар қайтып барады» секілді шығармалар осы сезімдердің сан қырын ашады. Бірі сұлулық пен сырбаздықты жырласа, бірі ананың аялы алақанын еске салады, енді бірі көңіл көкжиегін сағынышқа бөлеп, жүрекке жақын естеліктерді жаңғыртады.
Сахна төрінде республикалық байқаулардың лауреаттары, мәдениет саласының үздіктері, Қазақстанның еңбек сіңірген қайраткерлері мен Қазақстанның халық әртісі өнер көрсетеді. Әр орындаушының дара үні, өзіндік орындаушылық өрнегі мен әнге деген ыстық ықыласы дәстүрлі өнердің байлығын жаңа қырынан танытып, кештің көркемдік келбетін айқындайды. Ал концерттің соңында барша әншінің бір арнаға тоғысқан үнімен орындалатын ортақ әндер кештің әсерін еселей түсіп, өнер мен көрермен арасындағы рухани үндестікті бекемдейді.
«Еркесі еркін елімнің» – өткеннің өнегесін бүгіннің үнімен жалғап, ұлттық өнердің қадір-қасиетін жүрекпен сезінуге шақыратын тағылымды мәдени шара. Бұл сахнада халық әні жай ғана әуезді шығарма болып қалмайды. Ол – елдің өткені мен бүгінін жалғаған алтын көпір, ұлттың тарихи жады, халықтың рухани болмысы және уақыт көшінде жоғалмай, ұрпақтан ұрпаққа жеткен көркем шежіре.
Дәстүрлі әннің құдіреті – оның мәңгілігінде. Заман өзгерсе де, жүрекке жеткен әуеннің әсері өшпейді. Ұрпақ алмасса да, халықтың асыл мұрасы өз құнын жоғалтпайды. Ендеше, ғасырлардан жеткен сырлы сазға құлақ түріп, ата-баба аманатына айналған ән өнерінің қадірін бірге сезінейік!
Ұлттық рухты асқақтатып, жүректерді әнмен тоғыстыратын «Еркесі еркін елімнің» концертіне шақырамыз!
