Елордалық филармонияның қазіргі ғимаратының орнында Ақмола сауда орталығы - Қараөткел болған. Бұл ауқымды жәрмеңке аймақтың түкпір-түкпірінен келген саудагерлердің ғана емес, халық музыка өнерінің өкілдері үшін үлкен сахна болды. Мұнда атақты Ғазиз Файзоллаұлы, Сатмағамбет Ахметов, Қосымжан Бабақов, Қарақас, Қапаш, Исабай және тағы басқа әншілердің көптеген жанкүйерлері жиналды. Белгілі музыканттар өздерінің шығармаларымен қоса, Ақан сері, Біржан салдың әйгілі туындыларын да орындады. Филармонияның қазіргі музыкалық жан-жақтылығы мүмкін осыдан бастау алған шығар...

  ХХ ғасырдың ресми құжаттарында филармонияның құрылуы мен дамуының маңызды кезеңдері жазылған:           

  1957 жыл – «Целинконцерт» концерттік-эстрадалық бюросының құрылуы. 1965 жыл – латвиялық сәулетшілер Петерис Фогельс, Ольгертс Крауклис және Дайна Даннебергтің жобасы бойынша салынған Тың игерушілер сарайы негізінде Целиноград облыстық филармониясының құрылуы. Ауқымы мен жабдықталу жүйесі бойынша Тың игерушілер сарайы КСРО-да Кремль Съездер сарайынан кейінгі екінші болып саналды. Содан бері түпнұсқалық сәулет ғимаратының мәнерлі көрінісі оны қаладағы ерекше орынға айналдырды. Тың игерушілер сарайының 2500 орындық залының қызметі көп болды – концерттер мен съездер, кино сеанстары өткізілді. Ғимарат іргелес аумақпен бірге 32 гектар жерді алып жатты.

  1982 жыл - мемлекет қорғауындағы Республикалық маңызы бар тарих және мәдениет ескерткіштерінің тізіміне Филармония ғимаратын енгізу. 1997 жыл - Ақмола мемлекеттік облыстық филармониясы болып қайта құрылуы. 1998 жыл - Астана қаласының Мемлекеттік филармониясын құру.           

  1999 жылы - Тың игерушілер сарайы Қазақстанның жас астанасының барлық маңызды іс-шаралары өтетін Конгресс-холл болып өзгертілді. Алғашқы үлкен қабылдаулар мен жоғары үкіметтік деңгейдегі кездесулер осы концерт залында өтті. 2014 жылғы 21 қараша - Қазақстан Республикасы Үкіметінің қаулысымен филармонияға «Астана қаласы әкімдігінің Мемлекеттік академиялық филармониясы» мәртебесі берілді.           

  2021 жыл - Мемлекеттік академиялық филармонияға көрнекті қазақ композиторы Еркеғали Рахмадиевтің есімі берілді.           

  Еркеғали Рахмадиев атындағы Мемлекеттік академиялық филармония - елорданың жетекші концерттік-ағарту мекемесі және еліміздегі ең ірі филармония. Әр жылдары филармония басшылары Қ. Мыржықпай, Б. Байсағатов, С. Әбдірахманов болды. Бүгін Е. Рахмадиев атындағы МАФ бас директоры «Құрмет» орденінің иегері - Ерлан Дакенов. Е. Рахмадиев атындағы МАФ көркемдік жетекшісі - Қазақстанның еңбек сіңірген қайраткері, профессор Гүлмира Құттыбадамова.           

  Филармония құрамында 660 қызметкер, 13 шығармашылық ұжым жұмыс істейді: Қазақ оркестрі, Симфониялық оркестр, Үрлемелі оркестр, Ғ. Жұбанова атындағы Мемлекеттік ішекті квартет, Камералық хор, «Сарыарқа» фольклорлық ансамблі, «Шалқыма» халық би ансамблі, «Қорқыт» этно-ансамблі, «FORTE TRIO» мемлекеттік триосы, классикалық және эстрадалық вокал бөлімдері, халық әні бөлімі, «ALEM» заманауи би балеті.           

  Филармонияның шығармашылық ұжымдары мен орындаушылары ауқымды көлемде ағарту жұмыстарын жүргізіп, түрлі алаңдарда қайырымдылық шараларымен және мектептерде, университеттерде, ауруханаларда, әлеуметтік мекемелерде дәріс-концерттермен өнер көрсетеді. Қазақстан Мәдениет және спорт министрлігі, Қазақстан халқы Ассамблеясы, Астана әкімдігі ұйымдастыратын үкіметтік деңгейдегі халықаралық және республикалық маңызы бар барлық маңызды іс-шараларға қатысады. Мысалы, соңғы уақытта филармония музыканттары Әлемдік және дәстүрлі діндер көшбасшыларының съезінде, Роза Бағланованың 100 жылдық мерейтойы аясында Париждегі ЮНЕСКО штаб-пәтерінің сахнасында, Түркиядағы Көшпенділердің дүниежүзілік ойындарында, БАӘ-дегі Expo-2020 Dubai дүниежүзілік көрмесінде сәтті өнер көрсетті, Ресей Федерациясы, Грузия, Моңғолия, Өзбекстан, Түркия елдерінде өткен халықаралық байқауларға, Люксембургтегі Наурыз мерекесіне, «La cle des portes» (Франция), «Living Arts Culture Festival 2023» (Малайзия) фестивальдері және т.б. қатысты.           

  Филармонияның халықаралық ынтымақтастығы аясында Еуроодақ ұйымдарымен, Франция, Швеция, Польша, АҚШ, Италия және т.б. шет мемлекеттердің елшіліктерімен бірлескен жобаларға ерекше назар аударылады. Филармония ұжымдары мен әртістері соңғы 25 жылда әлемнің бес континентінде - Латвия, Қытай, Португалия, Венгрия, Франция, Швейцария, Ұлыбритания, Австрия, Испания, Италия, Египет, Түркия, АҚШ, Жапония, Лихтенштейн Княздігі, Ауғанстан, Оңтүстік Корея, Оман, Катар, БАӘ, Грузия, Ресей, Беларусь, Өзбекстан, Германия, Тайвань, Иордания, Катар, Түрікменстан, Бельгия, Нидерланды, Бразилия, Люксембург, Малайзия және т.б. елдерінде болып, бес жүзден астам концерт берді.           

  Музыка саласында жоғары білікті кадрлар еңбек етеді. Филармония құрамында нағыз жұлдыздар жұмыс істейді: Қазақстанның халық әртісі Нұржамал Үсенбаева, Қазақстанның еңбек сіңірген әртісі Майра Ілиясова, Қазақстанның он үш еңбек сіңірген қайраткері – Айтқали Жайымов, Арайлым Рахым, Светлана Айтбаева, Бибігүл Жанұзақ, Азамат Жылтыркөзов, Гүлзира Бөкейхан, Айгүл Қосанова және т.б. «Мәдениет саласының үздігі» төсбелгісінің иегерлері Телман Нүркенов, Тоғжан Жахин, Роза Шоткалиева және т.б. «Құрмет» орденінің иегерлері - Майра Ілиясова, Светлана Айтбаева, Алтынай Жорабаева, Айтқали Жайым, Әбдірасул Есекеев және басқалары. Филармония әртістерінің арасында «Мәдениет қайраткері» белгісінің иегерлері (Шолпан Қорғанбек, Әбдірасул Есекеев, Естай Мұқашев, Нұрлан Бекенов, Нұрай Танабаев және т.б.), «Дарын» мемлекеттік жастар сыйлығының лауреаттары (Қалқаман Дүйсембаев, Ақбота Құснадин, Алтынбек Әбілда және т.б.), республикалық және халықаралық байқаулардың лауреаттары да бар.           

  Әрбір жаңа бағдарлама орасан зор еңбектен тұрады, дегенмен филармония ұжымдары бір концерттік маусымда бірнеше музыкалық жобаларды дайындап үлгереді. Жалпы алғанда, бір жыл ішінде халық назарына әр түрлі стильдер мен бағыттардағы 50-ден астам концерттік бағдарламаларды ұсынады.           

  Филармонияның міндеті - әртүрлі бағыттағы музыкалық шығармаларды насихаттай отырып, жоғары ағартушылық қызметті орындау. Мәдени астананың шығармашылық және көркемдік өсуі қоғамға әсер ету мүмкіндіктері мол осы көрнекті концерттік ұйымның қызметімен байланысты. Ағартушылық және мәдени құндылықтарды насихаттау, өскелең ұрпақты тәрбиелеу, ұлттық және әлемдік өнердің рухани мұрасын сақтау және көбейту – осының бәрін астаналық филармония толық көлемде орындайды.