kense@astana-filarmonia.kz
қ. Астана, 010000, Кенесары көшесі, 32
1 сәуір күні Нұр-Сұлтан қаласы әкімдігінің Мемлекеттік академиялық филармониясының Симфониялық оркестрі (көркемдік жетекшісі Берік Батырхан, дирижері Ернар Нұртазин) «Біз біргеміз» акциясын қолдап, онлайн режимінде әйгілі композитор, дирижер, музыка сыншысы П.И.Чайковскийдің №5 симфониясын, «Аққулы көлін», және «Щелкунчик» шығармаларын классикалық музыканы сүйсіне тыңдайтын көрермендерге тарту етті.
Аталмыш туындыларды симфониялық оркестрдің музыканттары, Халықаралық байқаулардың лауреаттары Мирас Есмұхан, Салтанат Орынбаева, Қалқаман Дүйсембаев, Әлихан Жиганшин, Ильмира Ардашева, Айша Сырымбаева, Гүлназ Жолданова орындап, әлеуметтік желіде көпшіліктің ыстық ықыласына бөленді.
Естеріңізге сала кетсек, Елорда филармониясының симфониялық оркестрі музыка өнерінің кемеңгері, ұлы тұлға П.И.Чайковский атындағы Халықаралық фестивалін өткізбек ниетте болатын. Бірақ, жер-жаһандағы және елдегі төтенше жағдайға байланысты кейінге шегерілген-тін. Дегенмен филармония ұжымы халықтың еңсесін көтеру мақсатында, мұндай ізгі істі қолға алып, өзінің дайындығын тағы бір пысықтап алды.
Иә, адамзат тарихындағы музыка данышпаны, мәңгілік мұрасымен өшпес із қалдырған классик П.И.Чайковский фестивалінде бейбіт күнде жолығатынымызға кәміл сенеміз.