Батыс пен шығысты үндестірді

Е.Рахмадиев атындағы Мемлекеттік академиялық филармония және Ғ.Жұбанова атындағы Мемлекеттік ішекті аспаптар квартеті «Батыс-Шығыс: музыкалық параллельдер» кешін ұсынды. Концерт «Астана Опера» театрының К.Байсейітова атындағы камералық залында өтті.
Кеш бағдарламасы Йозеф Гайдн, Феликс Мендельсон, Арман Жайым өңдеген Нұрғиса Тілендиевтің «Аққу» шығармасынан тұрды. Йозеф Гайдн ішекті квартетке арналған 80-нен астам шығарма жазып, осы жанрдың негізін қалады, бүкіл шығармашылық жолын осы жанрға арнады.
Квартет жанры Феликс Мендельсонды да қызықтырып, 12 жасында ол квартетке фугалар жазды. Жиырма жасында №1 ішекті квартетті туындатты. Ал «Қыз Жібек» фильмінде аспандағы аққуды «Аққу» күйі­мен көлге қондырып, ойнақ салдырған Нұрғиса Тілендиевтің бұл шығармасы музыканың құдіретін паш етеді.
Ғ.Жұбанова атындағы Мемлекеттік ішекті аспаптар квартетінің көркемдік жетекшісі – Қазақстанның еңбек сіңірген қайраткері Ернар Мыңтаев (виолончель). Ұжым құрамында Айдар Тоқталиев (бірінші скрипка), Алексей Лебедев (екінші скрипка) және Бекзат Сайлаубайұлы (альт) бар.