Елордалық филармонияның маусымашар кеші өтті

Нұр-Сұлтан қаласы Мемлекеттік академиялық филармониясының «Інжу-маржан» атты дәстүрлі маусымашар кеші өтті, деп хабарлайды Елорда Инфо.

Кеште ғасырлар бойы сақталып келе жатқан халқымыздың музыка мұрасы насихатталып, қазақ жанының ғасырлар көшінде шаң баспаған сырлы айнасына айналған әндері шырқалды.

Қазақтың жаны мен бітім болмысынан жаралған өнер кешінде Қазақстанның еңбек сіңірген әртісі Майра Мұхамедқызы, ҚР Еңбек сіңірген қайраткері, Құрмет орденінің иегері Алтынай Жорабаева, Мәдениет қайраткері Шолпан Қорғанбек, ҚР Еңбек сіңірген қайраткері, Құрмет орденінің иегері Айгүл Қосанова, Халықаралық және Республикалық байқаулардың лауреаттары Айнұр Қонысбаева, Перизат Тұрарова, Жақсыгелді Маясаров, Мәдениет саласының үздігі Секен Сыздық, белгілі әнші Сәулежан Тағзия, талантты жас әнші Өзгеріс Шерікбай сынды өнер иелерімен бірге «Қорқыт» этно ансамблі және «Шалқыма» халық би ансамблі өнер көрсетті.